Spánn

Konungsríkið Spánn er konungsríki á Íberíuskaga í Suðvestur-Evrópu. Spáni tilheyra Baleareyjar í Miðjarðarhafi (Majorka, Menorka og Íbísa), Kanaríeyjar í Atlantshafi og útlendurnar Ceuta og Melilla í Norður-Afríku. Lönd sem liggja að Spáni eru Portúgal að vestan og Frakkland að austan. Auk þess er örríkið Andorra í Pýreneafjöllum á landamærum Spánar og Frakklands. Syðst á Spáni er kletturinn Gíbraltar, sem er lítið landsvæði undir yfirráðum Breta. Að norðaustan liggur Biskajaflói að Spáni, Atlantshafið að suðvestan og að sunnan er Gíbraltarsund og svo Miðjarðarhafið að suðaustan og austan. Syðsti oddi Spánar er jafnframt syðsti oddi meginlands Evrópu.

Allar umsóknir evrópskra nemenda um fyrstu námsgráðu, eða grunnnám, (grado) fara í gegnum Alþjóða fjarnámsháskóla Spánar (UNED Assis), þar sem farið er yfir prófskírteini nemenda og gengið úr skugga um að þeir nái því lágmarki sem krafist er. Þar á meðal eru kröfur um spænskukunnáttu og þurfa nemendur að sanna kunnáttu sína með t.d. SIELE prófinu, sem hægt er að taka hér á landi.

Eins getur verið að nauðsynlegt sé að framvísa vottorði um TOEFL prófið til þess að sýna fram á enskukunnáttu.

Umsóknarfrestur er auglýstur í byrjun apríl og þá jafnframt hvenær hann rennur út (yfirleitt einhvern tímann í júní).

Umsóknir um meistaranám eru hins vegar í gegnum vefi hvers háskóla fyrir sig.

Hægt er að leita til menntaskrifstofunnar hjá sendiráði Spánar í Svíþjóð. Þau bjóða upp leiðsögn til einstaklinga sem vilja fara til Spánar í nám og þurfa að láta meta nám sitt frá Norðurlöndunum á Spáni.

Grunnnám á háskólastigi eru 240 ECTS og er skipt upp í fjóra 60 eininga hluta.

Framhaldsnám er eitt til tvö ár og líkur með meistaraprófi.

Doktorsnám er þrjú til fjögur ár.

Skólagjöld í ríkisháskólana eru um 400 – 600 evrur á ári fyrir grunnnám. Gera má ráð fyrir mun hærri skólagjöldum í framhaldsnám. Í einkaskólum eru gjöldin á bilinu 3.000 til 50.000 evrur á ári.

Háskólar á Spáni 
Leit að námi á Spáni – ágæt leitarsíða á ensku um nám á Spáni.

Þótt enskukunnátta hafi batnað mikið á undanförnum áratugum á helstu ferðamannastöðum Spánar, er alls ekki hægt að ganga að því vísu að hægt sé að bjarga sér allstaðar á ensku. Því er mikilvægt að læra að minnsta kosti undirstöðuatriði í spænsku.

Menntasjóðurinn lánar fyrir tungumálanámi svo framarlega sem það sé undirbúningur fyrir frekara nám í sama landi. Reglurnar eru eftirfarandi:

• Námsmenn geta fengið námslán til tungumálanáms ef það er nauðsynlegur undirbúningur undir frekara nám í landinu.
• Lánið er ekki greitt út fyrr en sýnt er fram á innritun í frekara lánshæft nám í sama landi eða málsvæði.

Hér er listi (ekki tæmandi) yfir spænskunám fyrir útlendinga á Spáni:

• UniSpain.com – spænskunám á Spáni.
• Spanish in the Spanish world – Enforex skólar á Spáni og Suður-Ameríku
• Spænska fyrir útlendinga
• Spænskunám í Barcelona

Einhverjir möguleikar eru í boði hvað varðar nám á ensku á Spáni. Ekkert heildaryfirlit er til og því er nauðsynlegt að kanna framboð hvers skóla fyrir sig.

Mikilvægt er einnig að athuga hvort skólar á Spáni séu vottaðir sem háskólar af þarlendum yfirvöldum. Sumir einkareknir skólar eru hafa ekki leyfi yfirvalda til að gefa út evrópskt vottaðar BA/BS eða MA/MS gráður. Best er að fá það staðfest áður en nám hefst.

Menntasjóður

Gott getur verið að setja sig í samband við skólann sem um ræðir til að athuga hvort einhverjar stúdentaíbúðir séu í boði eða hvort skólinn mæli með sérstökum leigusíðum í sínu nágrenni. Annars hefur oft reynst ágætlega að nýta hópa á samfélagsmiðlum eða hafa samband við leigumiðlun. Þó er alltaf mælt með að vera á staðnum til að geta skoðað íbúðirnar áður en samningar eru gerðir, til að forðast að lenda í svikum.

• Idealista – vefsíða með fjölda íbúða til leigu um allan Spán

Sendiráð

Krækja á upplýsingar um sendiráð sem þjónar Íslandi og spænska sendiráðið á Íslandi.