Heimurinn bíður þín! 
Hvert langar þig að fara? Hér fyrir neðan getur þú lesið um fjölmörg lönd og fundið gagnlegar upplýsingar t.d. um skólakerfin í þeim. 
Athugaðu að þótt að land sé ekki á listanum þýðir það samt ekki að þú getir ekki farið þangað í nám! Það þýðir bara að við höfum ekki enn sett upplýsingarnar inn á vefinn. 

Argentína er land í Suður-Ameríku sunnaverðri. Það afmarkast af Andesfjallgarðinum í vestri og Atlantshafi í austri. Lönd, sem liggja að Argentínu eru Chile í vestri, Paragvæ og Bólivía í norðri, Brasilía og Úrúgvæ í norðaustri. Landið er næststærst að flatarmáli í Suður-Ameríku og hið áttunda í röðinni í heiminum. Íslenskir nemendur í spænsku hafa löngum stundað nám í spænsku við argentínska háskóla og eru í gildi samstarfssamningar milli háskóla landanna tveggja.

Í Argentínu eru starfræktir 115 opinberir háskólar og meira en 25 þúsund erlendir nemar stunda þar nám. Upplýsingar um aðgangskröfur, umsóknarfrest, uppbyggingu náms og annað sem máli kann að skipta er að finna á upplýsingavefjum viðkomandi skóla. Sótt er um beint til viðkomandi skóla. Yfirleitt rennur umsóknafrestur út í október eða nóvember. Í sumum tilfellum er krafist inntökuprófs eða einhverrar staðfestingar á að spænskukunnáttan sé nægjanleg.

Skólaárið hefst í mars og því líkur í nóvember eða desember. Nær undantekningalaust er kennt á spænsku. Margir háskólar bjóða upp á sérstök námskeið í menningu og sögu landsins sem ætluð eru útlendingum.

Langflestir þeir Íslendingar sem stundað hafa nám í Argentínu eru í skiptinámi, einkum í spænsku. Þeir taka eina til tvær annir við einhvern af háskólum landsins og fá námið viðurkennt sem hluta af námi sínu hér á landi. Nauðsynlegt er að ganga frá öllum samningum áður en haldið er af stað og fá þarf landvistarleyfi (sjá undir hagnýtar upplýsingar).

Nokkrir argentínskir háskólar hafa komist inn á alþjóðlega gæðalista, m.a. Universidad National de Córdoba , Universidad Austral og Universidad National de La Plata. Þá nýtur Universidad de Buenos Aires mikillar virðingar og einnig Universidad del Salvador sem Háskóli Íslands er með samstarfssamning við.

Bakkalárgráðan er kölluð Licenciatura og tekur 4-5 ár.
Meistaranámið kallast Especialización eða Maestría og tekur 1-2 ár. Fyrir þá sem hyggja á meistaranám að afloknu íslensku bachelorprófi er nauðsynlegt að kanna sérstaklega hvort skólinn samþykkir það þar sem það tekur ekki nema 3 ár.

Engin skólagjöld eru greidd í opinberum háskólum en í skólum sem reknir eru af einkaaðilum eru þau frá hálfri til einnar milljónar króna á ári.

Ekki er boðið upp á neitt háskólanám á ensku.

Námsmenn geta fengið námslán til tungumálanáms ef það er nauðsynlegur undirbúningur undir frekara nám í landinu. Lánið er ekki greitt út fyrr en sýnt er fram á innritun í frekara lánshæft nám í sama landi eða málsvæði.

Nauðsynlegt er að skoða vel hvort  Menntasjóður lánar til náms í Argentínu. Ef skólinn er ekki á lista sjóðsins yfir viðurkennda háskóla, er gott að hafa samband beint við starfsfólk hans.

Sækja skal um áritun hjá sendiráði Íslands gagnvart Argentínu, sem er í Osló. Eftirfarandi skal skila með umsókninni:

Afrit af vegabréfi sem gilt er í a.m.k. 6 mánuði eftir að viðkomandi hyggst vera kominn til Argentínu og er með a.m.k. tvær auðar síður

Afrit af skráningu þess háskóla sem nemandinn hyggst stunda nám við

Staðfesting frá lánasjóði eða banka á því að námsmaðurinn geti séð fyrir sér

Afrit af hreinu sakavottorði fyrir síðastliðin 3 ár

Kvittun fyrir greiðslu á gjaldi fyrir áritunina

Ef þörf er talin á, er farið fram á viðtal við námsmanninn í sendiráðinu.

Sumur háskólar reka stúdentagarða og eru þeir ugglaust ódýrasti kosturinn. Fyrir þá sem vilja leiga sér íbúð er hér listi yfir möguleika í Búenos Aíres þar sem ekki er krafist tveggja til þriggja mánaða leigu sem tryggingar:

https://www.facebook.com/groups/compartodepto/

https://www.olx.com.ar/items/q-departamentos-casas-alquiler

http://www.clasificados.clarin.com/inmuebles/departamentos-y-casas-1/

Utanríkisráðuneytið annast störf íslensks sendiráðs við Argentínu en argentíska sendiráðið gagnvart Íslandi er í Osló. 

Lýðveldið Austurríki  (Republik Österreich) er landlukt ríki í Mið-Evrópu með um 8,9 milljónir íbúa. Landið er sambandslýðveldi sem samanstendur af níu sambandsríkjum. Höfuðborg þess heitir Vín. Austurríki einkennist af hálendi Alpafjallanna en teygir sig einnig inn að Bæheimsskógi og Pannonísku sléttunni. 19 háskólar eru í landinu og þó nokkuð af sérskólum á háskólastigi (fachhochschulen). Íslendingar hafa mikið sótt í söng- og tónlistarnám til Austurríkis, en einnig annað nám.

Í Austurríki eru um 45 skólar á háskólastigi, þar af eru 17 Fachhochschulen sem eru minni háskólar sem sérhæfa sig í ákveðnum fögum. Háskólarnir í Vín, Graz, Innsbruck, Linz og Salzburg bjóða upp á öll hefðbundin háskólafög. Listaháskólar eru sex, fjórir læknaskólar og einn dýralæknaskóli staðsettur í Vín. Sérstakir háskólar eru fyrir tónlist og tónlistargreinar. Þar má m.a. nefna Universität für Musik und darstellende Kunst Graz, Universität für Musik und darstellende Kunst Wien og Universität Mozarteum Salzburg.

Skólaárið skiptist í tvo hluta, vetrarmisseri, sem hefst í október og stendur fram í janúar og sumarmisseri sem er frá mars og fram í júní. Gott vetrarfrí er á milli missera.

Sækja skal um í hvern skóla fyrir sig, ekki er neitt sameiginlegt umsóknarkerfi. Á vefjum flestra skóla er hægt að sækja um rafrænt og þar eru upplýsingar um ferlið í heild sinni. Umsóknarfrestur í háskólana er yfirleitt 1. september fyrir vetrarmisserið og 1. febrúar fyrir sumarmisserið. Upphaf náms er oftast á haustmisseri, en í stöku tilfellum er hægt að hefja nám á sumarmisseri. Margir háskólar bjóða upp á sérstakt nám fyrir útlendinga.

Til að fá inngöngu í austurríska háskóla, þarf oftast að sýna fram á að þú munir fá inngöngu í sambærilegt nám í heimalandinu. Þetta á þó ekki við í Fachhochschulen. Yfirleitt þarf að sýna fram á góða þýskukunnáttu og oftast þarf að taka þýskupróf, TestDaf eða ZOP. Í flestum borgum er auðvelt að komast á þýskunámskeið. OEAD heldur þýskunámskeið fyrir þá sem hafa fengið inngöngu en treysta sér ekki til að hefja venjulegt háskólanám strax. Umsóknarfrestur fyrir þau námskeið er til 1. sept. og með umsókninni verður að fylgja staðfesting um skólavist frá viðkomandi háskóla.

Líkt og önnur Evrópulönd er Austurríki aðili að Bologna áætluninni sem felur í sér samkomulag m.a. um samræmingu háskólagráða innan Evrópulanda. Samkvæmt því skiptist námið í bachelorgráðu sem tekur 3 ár og mastersgráðu sem tekur yfirleitt tvö ár, Magister (FH) (sérstök meistaragáða fyrir kennara), sem tekur 1-2 ár í viðbót, Diplom fyrir sérstakar starfsgreinar eins og lögfræðinga, sem tekur 4 og 6 ár og doktorsgráðu sem fæst eftir tveggja til fjögurra ára nám eftir mastersnámið.

Engin skólagjöld eru í ríkisháskólana í Austurríki, en borga þarf skráningargjald, sem er um 380 evrur fyrir hvert misseri. Annað á við um einkaskóla.

Österreichischer Austauschdienst (OEAD) – alþjóðaskrifstofa háskólanna í Austurríki, þjónusta við erlenda stúdenta.

Listaháskólar – arkitektúr, myndlist, hönnun, tónlist o.fl.

Í flestum tilfellum fer kennsla fram á þýsku. Þó kenna nokkrir háskólar á ensku, einkum viðskiptaháskólar, svo sem Donau-Universität Krems, Universität für Bodenkultur, Webster University o.fl.

Veitt er lán til undirbúningsnáms í tungumálinu í eitt misseri (tvo fjórðunga þar sem það á við) en athugið að lánið er skilyrðisbundið því að áframhaldandi nám verði stundað í Austurríki.  Skilyrði fyrir útborgun lánsins er að vottorði um inngöngu í áframhaldandi nám sé skilað inn til menntasjóðsins. 

Ekki þarf að sækja um vegabréfsáritun til Austurríkis, en sótt er um dvalarleyfi þegar komið er út. Þá er mikilvægt að hafa meðferðis staðfestingu á skólavist (acceptance letter), fjárhagsvottorð (t.d. frá Menntasjóði eða banka) um að þú getir fjármagnað dvöl þína í landinu, gilt vegabréf, passamyndir og Evrópska sjúkratryggingarkortið. Ekki þarf sérstakt atvinnuleyfi til að vinna í Austurríki.

Það má reyna að sækja um vist á stúdentagörðum hjá OEAD áður en haldið er utan. Þó á að vera tiltölulega auðvelt að útvega sér húsnæði eftir að komið er til landsins.

OEAD – Whonraumverwaltungs Gmbh, húsnæði í nokkrum stærstu borgum Austurríkis.

Österreichische Hochschüler Innenschaft, Landssamtök austurrískra stúdenta eru með tengla á húsnæðisleitarsíður fyrir námsmenn víðsvegar um Austurríki.

Sjá einnig CasaSwap.com – International youth & student accommodation network. Hérna geta stúdentar í leit að húsnæði erlendis skráð sig í húsnæðisleit og einnig skráð sitt húsnæði til leigu eða skipta. Casa Swap er styrkt af Evrópusambandinu.

Utanríkisráðuneytið á Íslandi annast sendiráðsstörf en austurrískt sendiráð er í Kaupmannahöfn

Bandaríkin eru sambandslýðveldi og samanstanda af 50 ríkjum. Landið er það fjórða stærsta í heiminum. Þar er að finna um 4.000 skóla á háskólastigi og sumir bestu háskólar í heimi eru þar.

Íslendingar hafa mikið sótt í nám til Bandaríkjanna í gegnum tíðina. Bandarískir háskólar eru mjög misjafnir að uppbyggingu og gæðum. Sjálfsagt er að kynna sér hvort skólarnir hafa faglega viðurkenningu, bæði í heild og einnig á því sérsviði sem er verið að sækja um inngöngu í. Hægt er að ganga að því vísu að ríkisskólar séu almennt viðurkenndir, en tryggara er að spyrjast fyrir um viðurkenningu einkaskóla. Einnig er hægt að athuga hvernig einstakir skólar eru metnir í ýmsum handbókum hlutlausra aðila, sem hafa tekið saman upplýsingar um bandaríska háskóla.

Skólaárið er vanalega frá ágúst/september til maí og skiptist í tvær eða þrjár annir, en oft er einnig möguleiki á að flýta fyrir sér í námi með því að nýta sumarannir, sem er boðið upp á í flestum skólum.

Umsóknarfrestur er mismunandi eftir skólum. Ráðlegt er að hefja undirbúning umsóknar tímanlega, helst einu og hálfu ári áður en áætlað er að hefja nám. Athugið að stundum þarf að greiða umsóknargjald sem ekki fæst endurgreitt fái fólk ekki skólavist. Umsóknareyðublöð eru yfirleitt á vefjum viðkomandi skóla og þar er greint frá hvaða fylgigögnum ber að skila.

Vegna þess hve úrvalið af skólum og námsbrautum er mikið, er sjálfsagt að taka tillit til þátta eins og staðsetningar, veðurfars og umhverfis. Athugið að innanlandsflug í Bandaríkjunum er oft álíka dýrt og farmiði til Íslands og því ber að hafa staðsetningu „íslenskra flugvalla“ í huga ef margir skólar koma til greina.

Ráðlegt er að sækja um inngöngu í fleiri en einn skóla og ekki einskorða umsóknir við þekktustu skólana, því að samkeppni um skólavist í bestu skólunum er mjög hörð (hjá sumum háskólum komast innan við 5% umsækjenda að). Einnig er rétt að huga að reglum Menntasjóðs Námsmanna (MSN) um lán til greiðslu skólagjalda og ættu allir að kynna sér þær  vel áður en teknar eru ákvarðanir um nám í Bandaríkjunum.

Nánast allir sem sækja um nám í Bandaríkjunum, hvort sem um er að ræða undergraduate eða graduate nám, þurfa að taka TOEFL prófið (Test of English as a Foreign Language). Frekari upplýsingar um TOEFL má lesa hér. 

Hér fyrir neðan er listi af prófum sem gæti þurft að taka til að komast inn í grunnnám (undergraduate degree) í Bandaríkjunum. Hægt er að lesa nánar um prófin og hvar þau eru haldin á Íslandi á vef Fulbright.

SAT – Scholastic Aptitude Test (Grunnnám)

Skylt er að taka SAT prófið fyrir grunnnám í mörgum bandarískum háskólum. En prófið er hannað til þess að skoða þekkingu bandarískra nemenda eftir high school. 

1. SAT – Reasoning test: Prófar þekkingu og færni í lestri, skriflegri færni og stærðfræði. Lestrarhlutinn á að meta lesskilning og setningarfræði (200-800 stig). Skriflegi hlutinn krefst þess að skrifuð sé stutt ritgerð og spurt er út í málfræði (200-800 stig). Stærðfræði hluti prófsins prófar m.a. algebru, líkindareiknig og tölfræði (200-800 stig).

2. SAT – Subject test: Prófar þekkingu í sérstökum fögum.

Einnig eru sérstök próf fyrir eftirfarandi fög:

Náttúrufræði (líffræði, efnafræði og eðlisfræði)

Verzlunarskóli Íslands heldur SAT prófin á Íslandi. Skráning fer eingöngu fram á vef SAT með 4 vikna fyrirvara. Prófgjaldið er á bilinu 50-70 $, eftir því hvort skrifuð er ritgerð.

ACT – American College Test (Grunnnám)

ACT er annað inntökupróf í grunnnám í Bandaríkjunum. Það er þekkingarpróf í námsefni “high school” þar í landi og er prófað í stærðfræði, líffræði, eðlisfræði og ensku. Oftast er hægt að taka ACT prófið í stað SAT en gott er að fá það staðfest af skólanum úti.

Skráning í prófin fer eingöngu fram á vef ACT með 5 vikna fyrirvara. Verð 60-80 USD. Prófið fer fram hjá Flensborgarskólanum í Hafnarfirði.

GMAT – Graduate Management Admission Test (Framhaldsnám)

Próf sem flestum er skylt að taka ætli þeir í hagfræði eða viðskiptatengt nám, þar með talið MBA nám.

Prófið skiptist í fjóra hluta og tekur u.þ.b. þrjá og hálfan klukkutíma. Hlutarnir fjóru eru:

1. Analytical Writing Assessment (30 mín)
2. Intergrated Reasoning (30 mín)
3. Quantitative (75 mín)
4. Verbal (75 mín)

Nánari upplýsingar um prófið og verð má lesa á heimasíðu GMAT.

GRE – Graduate Record Exam (Framhaldsnám)

Próf ætlað fyrir þá sem ætla í framhaldsnám (graduate studies) í Bandaríkjunum. Bæði er hægt að taka almennt próf og subject -test. Hið almenna er það sem flestir taka. Athugið: síðustu ár hefur GRE-prófið verið í auknum mæli valfrjálst í námsumsóknum. Gæta þarf að athugun á hverri námsbraut fyrir sig um hvort þurfi að taka prófið eða ekki. Ef það stendur að GRE sé „optional“ þá fer það alveg eftir vilja umsækjanda hvort hann þreytir prófið eða ekki. Það hefur ávallt engin áhrif á gæði umsóknargagna ef umsækjandi kýs ekki að þreyta prófið ef það er „optional“. Hafa þarf í huga að hver skóli setur sínar aðgangskröfur og best er að hafa samband við skólann sjálfan í gegnum tölvupóst eða síma ef einhver vafi er á. 

Prófstaður fyrir almenn GRE®-próf (GRE® General Test) á Íslandi er hjá PROMENNT í Skeifunni og fara þau fram í tölvuveri (Computer Based Test). Nánari upplýsingar, verð og skráning.

Skráningarfrestur rennur út u.þ.b. 5 vikum fyrir settan prófdag, en próftökum er bent á að skrá sig tímanlega. Bent skal á að á prófstað þurfa próftakar að framvísa gildum skilríkjum (vegabréfi eða ökuskírteini). Þeir þurfa einnig að hafa með sér GRE Admission Ticket.

Nánari upplýsingar um GRE-próf og skráningu í þau má fá á vefsetri ETS.


Stúdentspróf og háskólapróf eru vísasti vegurinn til að fá inngöngu í bandaríska háskóla, en þó finna aðra möguleika fyrir þá sem ekki hafa þessi próf. Hins vegar er afar misjafnt hvernig bandarískir háskólar meta íslenskt stúdentspróf og er alfarið undir viðkomandi skóla komið hvort og þá hversu mikið það próf verður metið til að stytta byrjunarnám (undergraduate level). Varðandi þetta þarf að senda fyrirspurnir til skólanna sem sótt er um inngöngu í.

Fyrsta skrefið er að skoða á netinu umsóknareyðublöð og aðrar upplýsingar. Skoðið einnig heimasíðu Fulbrightstofnunarinnar.

Það er einnig gott að senda inn fyrirspurnir til alþjóðaskrifstofu þess skóla sem um ræðir (International office).  Til þess að skólarnir geti svarað öllum spurningum þarf að vanda þessa beiðni. Rétt er að þar komi strax fram helstu upplýsingar um námsferil, námsáætlanir, enskukunnáttu og fjárhagslega getu til að stunda viðkomandi nám. Jafnframt skal spyrjast fyrir um hvernig fyrra nám verði metið, hvaða möguleikar séu á styrkjum og hvaða stöðupróf sé ætlast til að viðkomandi taki áður en umsókn verður tekin til athugunar hjá viðkomandi skóla. Leggið áherslu á að fá svar við þessum spurningum því oft senda skólarnir frá sér staðlaða upplýsingapakka.
Umsóknareyðublöðin skýra sig sjálf en ganga skal vel frá öllum fylgibréfum. Hafið eftirfarandi í huga:

1. Afrit af prófskírteini á að vera á ensku ásamt útskýringum á einkunnaskala og kennsluefni námskeiða. Ef sótt er um mat á námskeiðum (transfer credit) er mikilvægt að upplýsingar um kennsluefni séu sem ítarlegastar. Allt skal þetta staðfest af skóla eða löggiltum skjalaþýðanda.
2. Biðjið kennara að vanda meðmæli. Látið meðmælanda fá frímerkt umslag með heimilisfangi skóla og með nafni umsækjanda í neðra vinstra horni. Oft senda skólarnir stöðluð meðmælabréfsform.
3. Fáið vottorð hjá Menntasjóði um væntanlegan stuðning þeirra og fullvissið ykkur um að námið sé lánshæft.
4. Þegar send er greiðsla til skólans (annað hvort fyrir bara það að sækja um eða þegar greidd eru skólagjöld (tuition fee)) er áríðandi að merkja greiðsluna vel og biðja um kvittun.
5. Lesið umsóknina vel yfir og gangið úr skugga um að hún sé í lagi.

Ekki kemur að sök þó að sótt sé um skóla og lokaprófi í yfirstandandi námi ljúki ekki fyrr en eftir að umsóknarfrestur rennur út. Látið þess getið að þið munið senda lokaprófskírteini við fyrsta tækifæri. Þegar svör fara að berast þarf að senda skriflegt afsvar til þeirra skóla sem ekki verða fyrir valinu.

Umsækjendur um framhaldsnám (graduate level) ættu, eftir því sem kostur er, að afla upplýsinga um deildir og fræðistörf kennara á sínum sérsviðum við þá skóla sem þeir hyggjast sækja um inngöngu í. Sérhæfing og orðspor deilda og einstakra kennara kann að skipta umsækjendur meira máli en almenn staða skólanna, þar sem umsækjendur í framhaldsnámi eru oftast að leita eftir ákveðinni sérþekkingu með námi sínu.

Þegar sótt er um doktorsnám (PhD) í bandarískum háskóla er ávallt gott að hafa samband við áætlaðan leiðbeinanda eftir að umsækjandi er búinn að afla sér upplýsingar um skólann og starfsfólk áður en sótt er um námið.  Einnig er vert að hafa í huga að flestir doktorsnemar í bandarískum háskólum fá „skólastyrk" til þess að geta stundað nám við skólann, doktorsnemar sinna þá aðstoðarkennslu (Teaching Assistant) í staðinn.  Athugið að doktorsnám í Bandaríkjunum getur verið 5 til 7 ára nám.

Skólagjöld (tuition fees) eru há, en geta þó verið mjög mishá. Eins og víða annars staðar er mikil samkeppni milli einstakra skóla, en gott er að hafa í huga að ekki fylgist alltaf að verð og gæði. Bæði einkaskólar og ríkisreknir innheimta skólagjöld og eru þau yfirleitt hærri við einkaskólana, þótt það sé alls ekki algilt.

Í ríkisreknu skólunum er yfirleitt um að ræða tvo verðflokka, einn fyrir þá sem búa í viðkomandi ríki (in-state tuition) og annar verðflokkur fyrir alla aðra námsmenn (out-of-state tuition), sem eru mun hærri. Skólagjöd við ríkisskólana eru á bilinu 8.000$ – 20.000$ á ári (out-of-state), en við einkaskólana eru þau gjarnan á bilinu 15.000$ – 30.000$ á ári. Þetta eru viðmiðunargjöld, þau geta bæði verið lægri og hærri.

Frekar litlir möguleikar eru á því að fá námsstyrki fyrr en fólk er komið í framhaldsnám (graduate). Þó er ekki útilokað að fá námsstyrk í grunnnámi eins og t.d. íþróttastyrk.

Til eru um 4.000 skólar á háskólastigi í Bandaríkjunum þar af um 1.800 sem veita bachelor gráðu eða hærri gráður. Þó nokkuð stór hluti skóla á háskólastigi eru svokallaðar community colleges eða junior colleges sem eru með tveggja ára nám og veita associate gráðu.

Gradschools.com – mjög góð leitarvél fyrir framhaldsnám (graduate) í Bandaríkjunum.
College Sport Scholarships – leitarvél fyrir íþróttastyrki.

EduPass – þessi síða veitir upplýsingar fyrir þá sem huga að námi í Bandaríkjunum

CollegeNET, góð síða um “undergraduate” nám í Bandaríkjunum. Hægt að leita að “2-year college”, “4-year college”, “Voc/Tech College” o.fl. Styrkir, umsóknareyðublöð (online).

Starfsnám, tæknimenntun, iðnnám,  hægt að leita eftir fylkjum, eingöngu einkaskólar.

Læknisfræði, tannlækningar, dýralækningar, lögfræði:

Til þess að stunda nám í þessum fögum, þarf fyrst að klára bachelor gráðu. Nemendur kjósa ávallt að sérsníða grunnnámið sitt eftir því sem þeir ætlast til að sækja um, hér er oft talað um að vera „pre-law" eða „pre-med", ekki er verið að tala um ákveðið grunnnám í strangri merkingu. Nemandi sem ætlar sér t.d. að fara í lögfræði gæti tekið heimspeki, sagnfræði, stjórnmálafræði eða sambærilegt í grunnnámi og sótt svo um lögfræðinám (Law School). Auk þess að hafa lokið grunnnámsgráðu þarf að þreyta inntökupróf lögfræðináms eða LSAT (Law School Admissions Test).   

Aðeins öðruvísi kröfur gilda fyrir læknisfræði. Eins og í lögfræðinni er ekkert nám sem heitir í raun „pre-med" heldur er það hugtak yfir grunnnámskeið sem hægt er að klára í grunnnámi í t.d. líffræði eða efnafræði. Ólíkt lögfræðinni eru þessi námskeið forkröfur fyrir áframhaldandi læknisnám (Medical School). Nemendur þurfa einnig að þreyta inntökuprófi í áframhaldandi læknisnám MCAT (Medical College Admissions Test) sem þeir taka á síðasta árinu í grunnnámi sínu. 

Almennar upplýsingar um nám í Bandaríkjunum fást hjá Fulbright stofnuninni, Hverfisgötu 105, Reykjavík. Stofnunin býður upp á styrki fyrir íslenska námsmenn og fræðimenn sem óska eftir því að stunda nám í Bandaríkjunum. Umsóknarfresturinn er um miðjan október fyrir næstkomandi skólaár en allar upplýsingar er hægt að finna á heimasíðu Fulbright. Athugið að bandarískir ríkisborgarar og þeir Íslendingar með tvöfaldan ríkisborgararétt (Ísland og Bandaríkin) geta ekki sótt um styrk til náms í Bandaríkjunum á vegum Fulbright á Íslandi.

Mikilvægt er að kynna sér úthlutanreglur Menntasjóðs bæði hvað varðar framfærslu- og skólgjaldalán. Menntasjóður Námsmanna lánar einungis upp að vissu marki sem þarf að hafa í huga við umsókn í háskóla í Bandaríkjunum.

Hér má lesa um dvalarleyfi fyrir námsmenn (námsmanna visa) í Bandaríkjunum.

Hér eru krækjur á bandaríska sendiráðið á Íslandi og íslenska sendiráðið í Bandaríkjunum.

Belgía (hollenska: België; franska: Belgique; þýska: Belgien) er konungsríki í Vestur-Evrópu sem á landamæri að Hollandi, Þýskalandi, Lúxemborg og Frakklandi. Auk þess liggur strönd Belgíu að Norðursjó. Belgía liggur á mörkum germönsku og rómönsku Evrópu. Í norðurhluta landsins, Flandri (Vlaanderen), er töluð flæmska (sem er náskyld hollensku), en í syðri hlutanum, Valloníu (Wallonie) er töluð franska. Þýska er töluð í austurhluta landsins. Brussel, hin tvítyngda höfuðborg Belgíu, liggur í Flandri, nálægt mörkum að Vallóníu. Belgía er ein af stofnþjóðum Evrópusambandsins og eru höfuðstöðvar þess í Brussel. Evrópskar höfuðstöðvar NATÓ eru einnig staðsettar í landinu og EFTA samtökin eru með stórt útibú þar.

Skólaárið í Belgíu hefst í byrjun október og lýkur í lok júní og skiptist í tvö misseri.

Umsóknarfrestur í háskólana í Flandern er yfirleitt 1. maí fyrir næsta skólaár. Ekki er um að ræða neitt sameiginlegt umsóknareyðublað, heldur er umsókn send beint til viðkomandi skóla. Í frönskumælandi háskóla þarf að sýna fram á frönskukunnáttu.

Háskólar í Flandern: í Flandern eru 33 skólar á háskólastigi, 10 Universiteit og 23 svokallaðir Hogescholen. Stærsti háskólinn er Katholieke Universiteit Leuven með yfir 20.000 stúdenta. Kandidaat kallast fyrsta háskólagráðan, sem tekur 2-3 ár að ljúka. Næsta gráða heitir Licentiaat, 2-3 ára nám eftir Kandidaat. Doctoraat tekur 2-6 ár að loknu Licentiaat.

Háskólar í Vallóníu: Annars vegar er um að ræða Universités, sem eru háskólar með margar deildir og hins vegar Hautes écoles sem eru sérskólar á háskólastigi. Fyrsta gráða er oftast Candidature sem fæst eftir tveggja til þriggja ára nám, síðan Licence eftir 4 til 5 ár. Grade de docteur fæst síðan eftir minnst tvö til sex ár í viðbót við Licence.

Skólagjöld eru ekki innheimt í ríkisháskólum í Belgíu, en stúdentar borga innritunargjald sem er yfirleitt á bilinu 500 til 700 evrur fyrir árið.

Leit að námi í Flandern     
Háskólanám í Vallóníu
Háskólar í Belgíu – tengingar við heimasíður skólanna. Velja “World listing” og síðan “Belgium”

Nærri allt nám í Belgíu fer fram á þjóðtungunum þremur, flæmsku, frönsku og þýsku. Þó má finna allt að 50 námskeið hér á ensku en lesa þarf um hvern skóla fyrir sig.

Veitt er lán til undirbúningsnáms í tungumálinu í eitt misseri (tvo fjórðunga þar sem það á við) en athugið að lánið er bundið því skilyrði að áframhaldandi nám verði stundað í Belgíu. Skilyrði fyrir útborgun lánsins er að vottorði um inngöngu í áframhaldandi nám sé skilað inn til menntasjóðs.

Í Brussel er húsnæði dýrt en mun ódýrara í hinum háskólabæjunum. Þó er húsnæði misdýrt eftir hverfum og oft er hægt að fá ódýrt húsnæði í innflytjendahverfunum. Við flesta háskóla eru stúdentagarðar en erfitt er að komast inn á þá, skólarnir reka einnig húsnæðismiðlanir. Almennt er erfitt að fá húsnæði, sérstaklega fyrir fjölskyldur og eru námsmenn hvattir til að finna sér húsnæði áður en skóli hefst. Það má byrja að athuga allt að ári áður.

Upplýsingar um húsnæði á vef Study in Belgium.

Belgía er á Evrópska efnahagssvæðinu og þá gilda eftirfarandi reglur: Þegar komið er út þarf að skrá sig inn í landið innan 8 daga. Þá er mikilvægt að hafa með sér vottorð um skólavist (acceptance letter) og fjárhagsvottorð (t.d. frá Menntasjóði eða banka) um að þú getir fjármagnað dvöl þína í landinu. Einnig er mikilvægt að hafa með sér Evrópska sjúkratryggingakortið, gilt vegabréf og 3-5 vegabréfsmyndir. Ekki þarf sérstakt atvinnuleyfi til að vinna í öðru EES landi.

Íslenskt sendiráð er í Brussel en belgíska sendiráðið er í Osló. 

Belís er lítið land á austurströnd Mið-Ameríku við Karíbahaf, með landamæri að Mexíkó í norðvestri og Gvatemala í vestri og suðri. Nafn landsins, og fyrrum höfuðborgarinnar Belísborgar, er dregið af Belísá. Belís hét Breska Hondúras til ársins 1973. Landið fékk sjálfstæði 1981. Í Belís dafnar fjölbreytt menning og mörg tungumál eru töluð þar, en enska er opinbert tungumál landsins. Innan Mið-Ameríku hefur Belís mikla sérstöðu og er skyldara ríkjum Karíbahafsins, sem einnig eru fyrrum nýlendur Breta. Höfuðborg Belís er Belmópan en Belís er þéttbýlasta borgin og helsta hafnarborg landsins. 

Margir bandarískir háskólar eru með útibú í Belís og, þar sem mun ódýrara er að læra þar en í Bandaríkjunum, stunda um 2.300 Bandaríkjamenn þar nám

Þrátt fyrir að Belís sé fámennt land er ekki hægt að tala um eitt menntakerfi fyrir landið heldur nokkur samhangandi kerfi. Grunnhugmyndin kemur frá Bretlandi og kerfið skiptist í grunnskóla, framhaldsskóla og háskóla. Að loknum framhaldsskóla taka nemendur breska prófið Cambridge Advanced eða A-levels. Einnig er hægt að taka bandaríska prófið Associate of Arts og það er undir nemendum komið og  hvert þeir stefna hvort prófið þeir velja.

Innlendir háskólar eru þrír og margir erlendir háskólar, þá sérstaklega bandarískir, eru með útibú í Belís. Belís tekur einnig þátt í hinum fjölþjóðlega Háskóla vestur-indía (University of the West Indies) sem er með útibú í Belís.

Sótt er beint um til hvers háskóla fyrir sig. Engar leitarvélar eru til fyrir allt nám í landinu og þær síður sem vísað er á hér að neðan eru e.t.v. ekki með tæmandi upplýsingar.

Námsgráður í Belís eru ýmist enskar eða bandarískar. Það er afar áríðandi að kynna sér vel hvaða réttindi þær gefa, bæði hvað varðar atvinnuréttindi og rétt á framhaldsnámi.

Skólagjöld eru afar mismunandi eftir skólum og gráðum. Mikilvægt er að kynna sér vel hvort Menntasjóður lánar ekki fyrir  fyrir þeim. Ef Íslendingar hafa ekki áður stundað nám við viðkomandi skóla, þarf að sækja sérstaklega um að námslán fáist.

Nauðsynlegt er að skoða vel hvort  Menntasjóður lánar til náms í Belís. Ef skólinn er ekki á lista sjóðsins yfir viðurkennda háskóla, er gott að hafa samband beint við starfsfólk hans.

Sambandslýðveldið Brasilía (República Federativa do Brasil) er stærsta og fjölmennasta land Suður-Ameríku og hið fimmta stærsta í heiminum bæði að flatarmáli og fólksfjölda. Landið er yfir 8.5 milljónir km² að flatamáli og teygir sig frá ströndum Atlantshafsins að rótum Andesfjalla og innan landamæra þess er megnið af Amazon-regnskóginum, stærsta regnskógi heims, en einnig víðáttumikil landbúnaðarsvæði. Strandlína Brasilíu er 7. 367 km löng. Brasilía var portúgölsk nýlenda frá 1500 en síðan 1822 hefur það verið sjálfstætt.

Margs konar stofnanir teljast til háskólastofnana í Brasilíu; eiginlegir háskólar, háskólasetur, stofnanir fyrir æðri menntun og tækniháskólar. Alls eru þessar stofnanir yfir 2.000 talsins og eru ýmist í opinberri eigu eða einkaeigu. Opinberu skólarnir njóta meira álits og þykja bjóða upp á betri menntun. Námið skiptist ekki upp í einingar eins og þær sem við þekkjum en eitt háskólaár er frá 800 til 1.200 kennslustundir. Skólaárið hefst í mars og því lýkur í desember.

Umsóknafrestur er misjafn milli skóla sem og aðgangskröfur og kröfur um gögn sem þarf að skila. Hafið samband beint við viðkomandi skóla til að fá frekari upplýsingar. Íslenskt stúdentspróf ætti að nægja til inngöngu en þó getur verið að beðið sé um t.d. próf í portúgölsku til þess að sýna fram á málakunnáttu. Eina viðurkennda prófið er CELPE-Bras sem ekki er hægt að taka hér á landi; næsta prófmiðstöðin er við King’s College í London.  Nokkrir háskólar bjóða upp á undirbúningsnám fyrir útlendinga í málinu. Hafa ber í huga að nám við opinbera háskóla er fyrst og fremst ætlað landsmönnum og fólki frá nágrannalöndunum og því eru mjög fáir Evrópubúar þar við nám.

Háskólanám í Brasilíu skiptist í grunnám og framhaldsnám. Í grunnnámi (Bacharelado) er hægt að velja um:

Hug- og náttúruvísindi sem yfirleitt taka fimm ár.

Verkfræði sem nær alltaf tekur fimm ár þótt hugbúnaðarverkfræði taki aðeins fjögur.

Læknisfræði sem tekur sex ár og önnur heilbrigðisvísindi sem taka fimm ár.

Hjúkrunar- og lyfjafræði sem tekur fimm ár.

Annað nám sem miðar að starfsréttindum sem yfirleitt tekur fimm ár.

Stricto sensu viðurkennd framhaldsmenntun sem leiðir til eftirfarandi gráða:

Mestrado, tekur venjulega 2 ár og byggist á kunnáttu í a.m.k. einu erlendu tungumáli. Lýkur með meistararitgerð og veitir aðgang að doktorsnámi.

Mestrado Profissional er starfsmiðuð sérhæfing sem nýtur sömu stöðu og Mestrado en veitir ekki aðgang að doktorsnámi.

Doutorado er doktorsnám sem tekur að lágmarki 2 ár eftir Mestrado.

Lato sensu er ekki talið eiginlegt háskólanám en nýtur eigi að síður mikillar virðingar í einkageiranum. MBA-nám telst til Lato Sensu. Lato Sensu gráða gefur ekki réttindi til að halda áfram í doktorsnám.

Opinbert háskólanám í Brasilíu er ókeypis. Nám í einkaskólum er hins vegar mjög dýrt, frá 700.000 ÍSK og upp í 2.800.000 ÍSK á ári.

Cadastro Nacional de Cursos e Instituições de Educação Superior (Cadastro e-MEC) er brasilísk námsleitarvél. Allar upplýsingar eru á portúgölsku.

Nám á ensku heyrir til algerra undantekninga og er það þá fremur í formi einstakra námskeiða en heilla námsleiða.

Námsmenn geta fengið námslán til tungumálanáms ef það er nauðsynlegur undirbúningur fyrir frekara nám í landinu. Lánið er ekki greitt út fyrr en sýnt hefur verið fram á innritun í lánshæft nám í framhaldinu í sama landi eða málsvæði. Nauðsynlegt er að skoða vel hvort Menntasjóður lánar til náms í Brasilíu. Ef skólinn er ekki á lista sjóðsins yfir viðurkennda háskóla, er gott að hafa samband beint við starfsfólk hans.

Erlendir nemendur verða að sækja um dvalarleyfi hjá brasilíska sendiráðinu í Osló (sjá hér fyrir neðan) áður en þeir fara til Brasilíu og þurfa þá senda eftirfarandi gögn:

Vottað ljósriti af vegabréfi sem gildir a.m.k. næstu 6 mánuði. Best er að taka ljósrit og fara með það ásamt vegabréfi til næsta sýslumanns og fá hann til að votta ljósritið.

Umsóknareyðublað í tvíriti. Hafið samband við sendiráðið til þess að fá eyðublaðið.

Íslenskt sakavottorð á ensku, ekki eldra en 3 mánaða. Senda þarf frumrit og eitt ljósrit.

Vottorð þess efnis að viðkomandi hafi ráð á því að búa í landinu meðan á náminu stendur. Hægt er að fá slíka staðfestingu annað hvort hjá Menntasjóði eða viðskiptabanka. Brasilískt yfirvöld taka einnig gilda yfirlýsingu frá foreldrum um að þeir muni sjá fyrir námsmanninum.

Staðfesting á skólavist frá háskóla í Brasilíu. Athugið að þetta þarf að vera skóli sem viðurkenndur er af innlendum yfirvöldum.

Tekið getur dágóðan tíma að fá dvalarleyfi þannig að best er að ganga frá og senda inn umsókn um leið og skólalvist er tryggð.

Innan 30 daga frá komu til landsins þarf að skrá landvist hjá lögregluyfirvöldum . Oft eru þau lögregluembætti sem sjá um slíka skráningu staðsett á alþjóðaflugvöllum en ekki inni í borgunum og því getur verið hentugast að ganga frá skráningunni á flugvellinum um leið og komið er til landsins.

Erasmusu – leit að húsnæði í Río de Janeiró

Brasilíska sendiráðið er í Osló en utanríkisráðuneytið á Íslandi sinnir sendiráðsstörfum fyrir Íslands hönd.

Bretland eða Hið sameinaða konungsríki Stóra-Bretlands og Norður-Írlands skiptist í England, Wales, Skotland og Norður Íraland. Innan Bretlands eru því nokkrar þjóðir sem hafa eigið land, sína eigin sögu, menningu, hefðir, mállýsku og í sumum tilvikum tungumál. Skotland, Wales og Norður Írland hafa öll sitt eigið þing og Skotland hefur sitt eigið menntakerfi.

Margir Íslendingar hafa farið í nám til Bretlands bæði í grunn og framhaldsnám. Íslensk og bresk yfirvöld hafa undirritað samning sem tryggja óbreytt réttindi Íslendinga í Bretlandi eftir Brexit.

Bretland eða Hið sameinaða konungsríki Stóra-Bretlands og Norður-Írlands skiptist í England, Wales, Skotland og Norður Írland. Innan Bretlands eru því nokkrar þjóðir sem hafa eigið land, sína eigin sögu, menningu, hefðir, mállýsku og í sumum tilvikum tungumál. Skotland, Wales og Norður Írland hafa öll sitt eigið þing og Skotland hefur sitt eigið menntakerfi.

Um tvö nokkuð ólík skólakerfi er að ræða:

England, Wales og Norður-Írland er með svipað kerfi og við þekkjum á Íslandi (3 ár í bakkalár, 1 ár í meistaranám og 3 í doktorsnám).

Skotland hefur sitt eigin háskólakerfi. Nemendur byrja oft á undan öðrum nemendum í Bretlandi, 17 ára (en ekki 18). Grunnnám tekur venjulega 4 ár og er svipað og grunnnám í Norður-Ameríku. Í eldri háskólum í Skotlandi (t.d. í Edinborg, St, Andrews og Glasgow) útskrifast nemendur eftir 4 ár með MA þó þetta sé grunnnám. Framháldsnám er oft kallað MLitt (Master of Letters) og tekur 1 ár. Í nýrri skoskum háskólum útskrifast nemendur eins og í Bretlandi almennt með BA eða BSc í grunnámi og MA eða MSc í framháldsnámi.

Athugið að stundum er talað um Honours Degree en þá er alla jafna átt við BA eða BS gráður.

Skólaárið hefst í lok september og stendur fram til loka júní. Skiptist oft niður í þrjú misseri (first term, second term, third term).

Innritun í grunnháskólanám í allflesta breska háskóla fer fram í gegnum UCAS (Universities colleges & admissions service) sem raðar nemendum í skóla eftir framboði og eftirspurn. Umsóknareyðublöðin eru rafræn á UCAS síðunni.

Meðmælum t.d. frá kennurum af fyrri skólastigum.

Góð ráð varðandi meðmælanda (UCAS)

Íslenskt stúdentspróf í samanburði við A-levels: Nokkrir breskir háskólar hafa birt á heimasíðu sinni upplýsingar um það hvernig íslenska stúdentsprófið samsvarar inntökuskilyrðum þeirra á A-levels skalanum. Það má til dæmis má finna þessar upplýsingar á vefsíðu UCL háskólans. 

Breskir skólar krefjast nær undantekningalaust að tilvonandi nemendur standist enskupróf. Helstu próf eru IELTS og TOEFL. IELTS er algengara og athuga þarf sérstaklega hvort skólinn sem sótt er um taki TOEFL prófið gilt þar sem margir skólar neita að taka við því.

15. janúar: aðalumsóknarfrestur í grunnnám ef sótt er um í gegnum UCAS. Stundum er þó hægt að sækja um seinna

15. október: umsóknarfresturinn í Oxford University og University of Cambrigde.

15. október: umsóknarfrestur í læknisfræði, tannlækningar og dýralækningar.

Fresturinn er mismunandi fyrir framhaldsnám (á meistara- og doktorsstigi – “Postgraduate”) þær upplýsingar verður að sækja til hvers skóla fyrir sig.

Englandi, Wales og Norður-Irlandi: 3-4 ár
Skotlandi: 4-5 ár

Framhaldsnám (postgraduate)
Meistaragráða skiptist í annars vegar hefðbundna háskólakennslu og hins vegar sérstakt rannsóknanám: 12 mánuðir

Diplomanám (diploma/certificate) 9-12 mánuðir

Útlistanir og útskýringar á breskum háskólagráðum getur þú nálgast á síðunni Study UK.

Athugið að eins árs meistaragráður frá Bretlandi geta að hámarki veri metnar til 75 ECTS eininga við íslenska háskóla og oft aðeins til 60 ECTS eininga. Breskar meistaragráður eru á hæfniþrepi 6.1. skv. íslenska hæfnirammanum og veita því ekki aðgang að doktorsnámi, ólíkt 120 ECTS eininga meistaragráðum frá meginlandi Evrópu og Norðurlöndunum. Sama takmörkun myndi því gilda um aðgang að doktorsnámi í Noregi, Danmörku og Þýskalandi.

Stúdentar utan Bretlands þurfa að greiða svokölluð “over-seas” skólagjöld og telst Ísland í þeim hópi.

Grunnnám (Bachelor): 8 500 – 20 000 £ á ári.


Framhaldsnám (Master): 10 000 – 22 500 £ á ári.

Læknisfræði, dýra- og tannlækningar: 14 000 – 30 000 £ á ári.

Yfirlit yfir skólagjöld í mismunandi skólum má finna hér.

Á vef UKCISA má finna frekari upplýsingar og skilgreiningar á flokkunum.

Skólum og stofnunum er í sjálfsvald sett að ákveða hvaða týpu af gjöldum nemendur greiða.

Hvar í Bretlandi viltu læra? hér er hægt að finna alla háskólana eftir landshlutum.

UCAS  –  þegar sótt er um grunnháskólanám (undergraduate) í Bretlandi. Hægt er að nálgast umsóknareyðublöðin á síðunni. Aðalumsóknarfrestur er 15. janúar. Hægt er að leita að námi á grunnstigi (undergraduate). 

Clearing – yfirlit yfir það nám sem ekki er fullbókað í og enn hægt að sækja um (eingöngu grunnnám).

Nám í Bretlandi – leitarsíða, setja inn námsgrein og námsgráðu, “undergraduate” fyrir grunnnám (til bachelorgráðu) og “postgraduate” fyrir framhaldsnám (til mastersgráðu eða doktors).
Graduate Prospects – leitarsíða fyrir framhaldsnám (postgraduate).

British Council – síða ætluð þeim sem vilja nema eða starfa í Bretlandi.
Quality Assurance Agency for Higher Education – stofnun sem sér um mat á breskum háskólum.
UK Universities – listi yfir háskóla og ýmsar gagnlegar upplýsingar.

StudyAbroadUK er fyrirtæki sem aðstoðar erlenda nemendur við námsleit og umsóknir í breska skóla.
Study In Scotland – síða ætluð þeim sem vilja nema í Skotlandi.
Floodlight – leit að ýmsum námskeiðum í London.

Þar sem skólagjöld eru í háskóla í Bretlandi er mikilvægt að kynna sér úthlutanarreglur Menntasjóðs vel sérstaklega hvað varðar skólagjaldalán.

Að skrá sig í landið
Frá og með 1. janúar 2021 þurfa íslenskir námsmenn sem dvelja í Brelandi lengur en 6 mánuði samfellt að fá sérstakan “settled  eða pre-settled status” – sjá upplýsingar á síðu breska stjórnarráðsins.

Hafi námsmenn hug á að dvelja áfram í Bretlandi að loknu námi er þeim bent á að hafa samband við utanríkisráðuneytið eða sendiráð Íslands í London til þess að kynna sér reglur um dvalarleyfi.

Húsnæði
Best er fyrir þá sem eru að hefja nám að útvega sér húsnæði á stúdentagarði. Flestir skólar bjóða upp á slíkt og veita fyrsta árs nemum iðulega forgang. Skrifið til viðkomandi skóla eftir upplýsingum. Þeir sem ekki fá inni geta leitað til hins almenna markaðar. Hefjið húsnæðisleit tímanlega.

Félagslegar aðstæður
Evrópska sjúkratryggingarkortið gildir ekki lengur í Bretlandi og þurfa námsmenn að verða sér út um eigin sjúkratryggingu.

Í tengslum við marga skóla eru rekin barnaheimili fyrir starfsfólk og nemendur. Þar fyrir utan er ekki auðvelt að koma börnum fyrir. Skólinn hefst við sex ára aldur og er hægt að velja milli ríkisrekinna skóla og einkaskóla. Skóladagurinn er sex til sjö klukkustundir.

Sendiráð
Krækja á breska sendiráðið á Íslandi og íslenska sendiráðið í Bretlandi.

Lýðveldið Búlgaría (búlgarska България, Република България Republika Bălgarija) er land í Suðaustur-Evrópu við strönd Svartahafs. Höfuðborg landsins heitir Sófía. Eftir seinni heimsstyrjöldina varð Búlgaría hluti af Austurblokkinni. Eftir hrun Járntjaldsins 1989 var flokksræði afnumið og ný stjórnarskrá samþykkt árið 1991. Landið gerðist aðili að Atlantshafsbandalaginu árið 2004 og Evrópusambandinu árið 2007.

Búlgarskir háskólar hafa lengi staðið framarlega í raunvísindum og tæknifræði. Fjöldi erlendra nemenda hefur aukist á undanförnum árum, enda eru skólagjöldin lág og ódýrt að búa í landinu. Langflest nám í landinu fer fram á búlgörsku en framboð á námi á ensku, þýsku og frönsku hefur aukist á undanförnum árum. Fyrir þá sem vilja stunda nám á búlgörsku, er boðið upp á eins árs undirbúningsnám í tungumálinu. Að því loknu taka nemendur próf og þurfa að ná a.m.k. þrepi B2 á evrópska tungumálakvarðanum. Flestir erlendir nemar leggja stund á læknisfræði, eins og í svo mörgum öðrum löndum í Austur-Evrópu. Taka þarf inntökupróf og er hægt að fá nánari upplýsingar um það hjá Interhecs.

Auk hefðbundinna háskóla, eru margir tækniskólar í Búlgaríu og einnig eru þar reknir skólar sem bjóða upp á styttra nám á háskólastigi.

Skólaárið er frá september og fram í júní

Námsgráður í Búlgaríu fylgja hinum evrópska Bologna staðli sem þýðir að boðið er upp á bakkalárnám, meistaranám og doktorsnám.

Skólagjöld í Búlgaríu eru afar misjöfn eftir bæði skólum og fögum. Læknisfræði kostar 5.000-8000 € á ári og tækninám frá 2.900-3.500 €, svo gefin séu dæmi.

Upplýsingar um nám á ensku, þýsku og frönsku.

Fáir Íslendingar hafa hingað til stundað nám í Búlgaríu og því eru búlgarskir háskólar ekki á skrá hjá Menntasjóði. Hægt er að sækja um að einstökum skólum verði bætt á þann lista, ef nám þar er sambærilegt því sem þekkist hér á landi.

Húsaleiga er afar lág í Búlgaríu en erfitt kann að reynast að finna húsnæði. Flestir háskólanna reka eigin stúdentagarða og þar er hægt að fá herbergi fyrir um 45 € á mánuði. Leiga á lítilli íbúð getur kostað 500-1.000 € á mánuði.

Sækja skal um námsmannaáritun í búlgarska sendiráðinu í Osló og síðan dvalarleyfi hjá Útlendingaeftirlitinu í Sófíu við komuna til landsins.

ljósrit af tveim fyrstu opnunum í vegabréfinu

sönnun þess að námsmaðurinn geti séð fyrir sér (frá Menntasjóði eða banka)

staðfesting háskóla á nemendaplássi og kvittun fyrir skólagjöldum

hreint sakavottorð sem þýtt hefur verið á búlgörsku af löggiltum skjalaþýðanda

Íslenskt sendiráð er í Kaupmannahöfn og búlgarskt sendiráð er í Osló

Danmörk er það land sem flestir íslenskir námsmenn kjósa að fara til. Í Danmörku eru átta opinberir háskólar sem eru staðsettir víðsvegar um landið, auk þess sem starfræktar eru fjölmargar stofnanir sem bjóða upp framhaldsmenntun.

Danmörk er það land sem flestir íslenskir námsmenn kjósa að fara til. Í Danmörku eru átta opinberir háskólar sem eru staðsettir víðsvegar um landið, auk þess sem starfræktar eru fjölmargar stofnanir sem bjóða upp framhaldsmenntun. Háskólarnir átta er:

Viðskiptaháskólinn í Kaupmannahöfn (CBS)

Syddansk háskólinn í Óðinsvéum (SDU)

Umsóknarfrestur í grunnnám er  15. mars ár hvert.

Lönd

Argentína

Austurríki

Ástralía

Bandaríkin

Belgía

Belís

Brasilía

Bretland

Búlgaría

Danmörk

Egyptaland

Eistland

Finnland

Frakkland

Færeyjar

Grikkland

Holland

Indland

Írland

Ítalía

Japan

Jórdanía

Kanada

Kína

Kosta Ríka

Kólumbía

Króatía

Kýpur

Lettland

Litháen

Lúxemborg

Malta

Marokkó

Mexíkó

Namibía

Noregur

Nýja-Sjáland

Panama

Perú

Portúgal

Pólland

Rúmenía

Rússland

Síle

Slóvakía

Slóvenía

Spánn

Suður-Afríka

Suður-Kórea

Sviss

Svíþjóð

Taíland

Tékkland

Tyrkland

Ungverjaland

Úrúgvæ

Þýskaland